09.03.2016 11:00

Landsbréf hafa lokið fjármögnun á 12 milljarða króna framtakssjóði - Horni III

Landsbréf hafa lokið fjármögnun á nýjum 12 milljarða króna framtakssjóði, Horni III slhf. Hluthafar eru rúmlega 30 talsins og samanstanda af lífeyrissjóðum, fjármálafyrirtækjum og öðrum fagfjárfestum. Horn III mun fjárfesta í óskráðum íslenskum fyrirtækjum og verður lögð áhersla á fyrirtæki með trausta og góða rekstrarsögu. Í krafti stærðar sinnar hefur Horn III alla burði til að vera öflugur fjárfestir á sviði framtaksfjárfestinga hér á landi á næstu árum.

Framkvæmdastjórar Horns III eru þeir Hermann Már Þórisson og Steinar Helgason en þeir eru jafnframt framkvæmdastjórar Horns II sem einnig er framtakssjóður í stýringu Landsbréfa hf.

Landsbréf, rekstraraðili Horns III, er sjálfstætt starfandi fjármálafyrirtæki og starfar sem rekstrarfélag verðbréfasjóða og annarra sjóða og félaga um sameiginlega fjárfestingu. Eignir í stýringu Landsbréfa voru um síðustu áramót 129 milljarðar og eru um 13 þúsund einstaklingar og lögaðilar með fjármuni í stýringu Landsbréfa.

Fréttasafn